Citarum

Sajak NANDANG DAHLAN

Najan anjeun teu nyarita, najan anjeun teu balaka
tapi kuring moal kapalingan budi ku anjeun, sobat
ayeuna pasemon anjeun teu weleh alum jeung ngungun
galura anjeun kebek ku kahandeueulan jeung hanjelu

Naha nu asih dipulang sengit, naha nu haat teu dipirosea
kuring teh baheula mah sehat, beresih, jeung loba rajakaya
nya ku kasarakahan manusa, kuring jadi ngalanglayung
kitu meureun lamun kedal mah, lisan anjeun teh

Mangsa anjeun amuk-amukan, anu deukeut pahibut
nyalametkeun diri, kulawarga, jeung harta bandana
kabeh indit pada ngungsi, bari marawa hate prihatin
raja kaya anu tinggaleun pasti kakeueum, duka kumaha

Kuring rayat leutik nu geus lila wanoh jeung anjeun
teu bisa majar kumaha, ukur ngahelas, ngawawaas mangsa lawas
enya anjeun mah teu salah, da sagalana balukar lampah manusa
Citarum ! Citarum ! saha nu bisa ngubaran anjeun

Soreang, Januari 2009

Nandang Dahlan
Kp. Lebakwangi RT 01 RW 01
Desa Cingcin Kecamatan Soreang
Jl. Bandung-Soreang No. 347